Младите сакаат да избегаат од Македонија: Симовски кажа што ќе ги натера да останат дома

Македонија се соочува со сериозна демографска криза која со забрзано темпо го менува општествениот и економскиот пејзаж на земјата. Според експертите, нашата држава веќе е длабоко навлезена во фазата на демографска старост, карактеризирана со пад на наталитетот и зголемена смртност – тренд што доведува до постојан негативен природен прираст. Последните податоци укажуваат на просечна годишна загуба на повеќе од 8.000 лица.

Апостол Симовски, поранешен директор на Државниот завод за статистика и раководител на пописот од 2021 година предупредува дека Македонија се движи по пат кој може да ја доведе до драматично намалување на бројот на жители. Според неговите зборови, клучен чекор за сопирање на оваа негативна демографска спирала е членството во Европската Унија.

„Мора итно да се сопре иселувањето, особено на младите луѓе. Решението е влезот во ЕУ. Ако не се направи пресврт во европските интеграции во најкус можен рок, ќе продолжиме со уште побрзо празнење на државата. Не е нереално да се соочиме со ситуација во која бројот на жители ќе падне под 1,5 милион за четириесетина години“, вели Симовски во изјава за МИА.