Фото: Facebook
Тијана Р. (19), тинејџерка од Нови Сад, трагично го загуби животот пред два дена во Будва, за време на парасејлинг, каде што, според кажувањата на нејзини блиски пријатели, отпатувала заедно со роднина и нејзиното бебе.
Како што раскажуваат, тинејџерката заедно со стрина ѝ го испланирале одморот, но и кобниот ден кој, за жал, заврши со голема трагедија.
„Отиде во Црна Гора со роднината и нејзиното бебе. Бидејќи сопругот на роднината во тој период беше во странство, Тијана замина со неа за да ѝ помогне околу детето, но и заедно да уживаат на плажа и малку да се одморат“, започна приказната пријател на деветнаесетгодишната новосадска девојка.
„Кобното утро отидоа на плажа. Не купија карта за парасејлинг, туку едно момче на плажата им пријде и неочекувано ѝ понуди бесплатно возење. Таа прифатила и ја замолила роднината да ја фотографира и снима додека лета. Мафташе додека беше на пониска висина и се гледаше дека ужива, а потоа го заобиколија ридот и почнаа да ја креваат сè повисоко и повисоко. Роднината ја изгуби од вид, и токму тогаш се случи трагедијата, па таа не ни видела што точно се случило“, додава пријателот, кој сакаше да остане анонимен.
Според него, девојката била многу расположена и весела пред да полета, а целиот одмор бил однапред испланиран.
„Сè беше испланирано. За следниот ден беше најавен дожд, па веќе купиле карта за базен. Но, никогаш не стигна да оди… Ништо не укажуваше дека вакво нешто може да се случи. Никој не можеше ни да замисли ваков исход, очигледно ни таа, бидејќи си го испланира одморот и сите активности.“
Пријателите велат дека Тијана била полна со живот, со многу планови за иднината, имала само 19 години и целиот живот бил пред неа. Сега, нејзиното семејство е завиено во црно.
„Не знаеме што точно се случило за време на летот – дали добила напад на паника или се исплашила од нешто“, завршуваат нејзините пријатели.
