Фото: Православен богословски факултет „Св. Климент Охридски“ - Скопје
Поранешниот амбасадор на Македонија во Ватикан, Ѓоко Ѓорѓевски, го направи значаен духовен пресврт во својот живот, замонашувајќи се во редовите на Македонската православна црква – Охридска архиепископија.
Како што информира Скопската епархија, монашкиот чин бил извршен во храмот „Свети великомаченик Георгиј“ во скопското село Криви Дол, во присуство и со благослов на Архиепископот охридски и македонски г.г. Стефан. Со чинот на монаштво, Ѓорѓевски го доби духовното име Георгиј.
„На 27 и 28 мај 2025 година, во манастирот „Свети великомаченик Георгиј“ во Криви Дол, Скопје, се одржаа значајни духовни настани за Македонската православна црква – Охридска архиепископија. Д-р Ѓоко Ѓорѓевски, редовен професор на Православниот богословски факултет „Св. Климент Охридски“ во Скопје и поранешен декан на истиот, прими монашки постриг и беше ракоположен во јероѓаконски чин, добивајќи го името Георгиј“, се вели во соопштението.
Фото: Православен богословски факултет „Св. Климент Охридски“ – Скопје
