Истрагата за „Пулс“ заврши: Не се води постапка за Панчо зашто е тешко повреден, но е осомничен за пиротехника

Во интервју за ТВ24, државниот јавен обвинител Љупчо Коцевски откри дека еден од осомничените за употреба на пиротехнички средства, кој наводно е поврзан со музичкиот бенд ДНК, во моментов не се соочува со кривична постапка поради сериозна здравствена состојба.

„Има лица во многу тешка здравствена состојба и во консултација со лекарите е донесена одлука дека засега не се способни ниту да дадат изјава, ниту да биде покрената постапка против нив“, изјави Коцевски.

На новинарско прашање дали меѓу овие лица е и осомничениот член на бендот ДНК, кој беше директно поврзан со инцидентот со пиротехниката, Коцевски не даде конкретен одговор, но индиректно потврди дека станува збор за еден од нив.

„Такви информации не можам да споделувам, но има и такви случаи“, рече тој, негирајќи ја, но истовремено не исклучувајќи ја можноста дека токму осомничениот од ДНК е во оваа група лица.