Фото: Принтскрин
Претседателот на Сојузот на синдикати на Македонија (ССМ), Слободан Трендафилов, истакна дека продуктивноста на работната сила е директно поврзана со задоволството на работниците.
Според него, ниската продуктивност често е резултат на незадоволство кое не произлегува само од ниските примања, туку и од неквалитетните услови за работа. Сè додека не се изврши измена на постоечкото законско решение, минималната плата ќе остане фиксирана на 24.400 денари.
Во меѓувреме, социјалниот дијалог помеѓу Владата, синдикатите и работодавачите се одвива на солидно ниво. Како што информира претседателката на Организацијата на работодавачи, Владанка Трајковска, нивните членки го почитуваат Законот за минимална плата и ќе продолжат да го прават тоа сè додека не се усвојат нови регулативи. Таа нагласи дека фокусот повеќе не треба да биде само на минималната плата, туку на целокупниот пораст на платите во државата, што може да се постигне само преку зголемена продуктивност.
И заменик-министерот за економија, Марјан Ристески, се согласи со овој пристап, посочувајќи дека за одржлив економски развој и покачување на платите е клучно да се работи на подигнување на продуктивноста во сите сектори.
