Фото: Комерцијална банка
Тешка трагедија ја потресе струшката јавност утрово, откако на Детското одделение при Општата болница во Струга било донесено двомесечно бебе без знаци на живот. Веста ја потврди директорот на болницата, д-р Владимир Бунчески, кој истакна дека причините за смртта ќе бидат утврдени по спроведената обдукција.
Според информациите од Секторот за внатрешни работи Охрид, кои ги соопшти портпаролот Стефан Димоски, случајот бил пријавен во 8 часот и 30 минути наутро. Родителите, жители на село во околината на Струга, самите го донеле бебето во здравствената установа, но лекарите можеле само да констатираат смрт.
Надлежните органи преземаат мерки за целосно расветлување на случајот, а се очекува обдукцијата да даде повеќе информации за причините кои довеле до оваа ненадејна и трагична загуба.
