Фото: topmodelinternational_official
Минатата недела, во еден од најелегантните простори во Монако – салата Sporting Monte Carlo – се одржа големото финале на 21-то издание на престижниот меѓународен избор Top Model International 2025. На овој врвен моден настан, во конкуренција од 59 натпреварувачки од различни делови на светот, триумфираше младата македонска претставничка Лара Станчева, петнаесетгодишна ученичка во средното училиште „Георги Димитров“ од Скопје.
Ова е историски успех за Македонија, бидејќи за првпат земјата имаше свои претставници на овој интернационален моден избор. Лара е членка на Модно студио Црнокрак, од каде што и беше организирана нејзината учество и поддршка во текот на целиот процес. Од таму информираат дека победата на Лара е резултат на сериозна подготовка, посветеност и талент кој се истакна уште од првите претставувања.
Финалето привлече внимание од бројни модни агенции, фотографи и медиуми од целиот свет, а Лара ја освои титулата во категоријата фотомодели, со што не само што се истакна на светската модна сцена, туку и го претстави македонскиот стил и шарм на највисоко ниво.
