Мицкоски: Ќе има забрана за движење во шуми без дозвола, подготвени сме за можните пожари

На денешната надзорна расправа во Собранието, посветена на проблемот со аерозагадувањето и заштитата на животната средина, премиерот Христијан Мицкоски изјави дека државата оваа година е далеку подобро подготвена да се справи со евентуални шумски пожари, благодарение на конкретни институционални реформи и нови мерки за превенција.

Мицкоски посочи на долгогодишната неусогласеност и преклопувања во надлежностите помеѓу Дирекцијата за заштита и спасување и Центарот за управување со кризи. Како дел од реформскиот процес, а и во согласност со препораките од НАТО, двете институции ќе се обединат во единствен систем за координација и одговор на кризни ситуации.

Дополнително, Мицкоски најави и нова безбедносна мерка: за време на летните месеци, ќе биде воведена забрана за движење во шумски подрачја без соодветна дозвола. Секој што ќе сака да престојува, спортува или планинари во шумски предели ќе треба да поседува посебен документ или белешка, со цел да се минимизира ризикот од човечки фактор во настанување пожари.