Нов марш во Кочани на семејствата на настраданите во пожарот во дискотеката

Семејствата на трагично загинатите млади луѓе во пожарот што избувна во дискотеката „Пулс“ во Кочани, утре попладне по седми пат ќе го организираат „Маршот за ангелите“ – тивок протест со кој повторно ќе побараат правда, одговорност и отчетност од институциите.

Маршот е закажан да започне во 16:05 часот, симболично во истото време кога настанала трагедијата. Поворката ќе тргне од Паркот на Револуцијата, ќе помине низ централното градско подрачје и ќе се упати кон неколку клучни институции: Трговскиот центар, општинската зграда, Полициската станица, како и пред Основниот суд и Јавното обвинителство во Кочани.

Со овој марш, родителите и блиските на загинатите уште еднаш ќе го искажат својот револт поради, како што велат, бавната и селективна постапка во истрагата. Тие апелираат за неселективна правда и јавно ги повикуваат граѓаните и сите кои сочувствуваат со нивната болка да им се придружат и дадат поддршка.

Дополнителна поддршка за настанот даде и граѓанската иницијатива „Кој е следен?“, која обезбеди бесплатен автобуски превоз од Скопје до Кочани.