Фото: Принтскрин
Претседателот на Србија, Александар Вучиќ, најави значајни економски чекори и државни одлуки кои се однесуваат на зголемување на минималната плата, пензиите, како и нови вложувања во инфраструктурата ширум земјата.
Во своето обраќање, Вучиќ истакна дека биле одржани разговори со претставници на Владата и синдикатите, при што била донесена одлука за постепено зголемување на минималната месечна плата. Во моментов, минималецот во Србија изнесува 457 евра, што, како што потсети, е трикратно зголемување во однос на пред 11 години.
„Целта е до 1 јануари да ја зголемиме минималната плата на 550 евра. Првиот чекор ќе биде реализиран од 1 октомври, кога минималецот ќе порасне на 500 евра, а потоа, од почетокот на следната година, ќе достигне 550 евра. Тоа претставува значаен напредок за стандардот на нашите граѓани“, изјави Вучиќ.
