Фото: Принтскрин
Во рамките на хуманитарниот повик на Црвениот крст на Република Македонија за помош на погодените од разорниот пожар што ја зафати Кочани на 16 март 2025 година, досега се собрани вкупно 156.542.967 денари.
До 23 мај 2025 година, Црвениот крст на РСМ реализираше неколку исплати со цел финансиска поддршка на најтешко погодените семејства.
Од вкупно собраните средства, 52.038.593 денари се наменети како помош за семејствата на загинатите лица. Дополнително, за лицата кои поради повредите од пожарот беа приморани да се лекуваат надвор од државата, исплатени се 44.163.258 денари, додека за оние кои се лекуваа во домашни здравствени установи обезбедени се 11.247.250 денари.
Вкупниот износ на досега распределената финансиска помош изнесува 107.449.101 денар, што претставува значителен чекор во ублажувањето на последиците од оваа трагедија и поддршка за погодените граѓани.
„Преостанатите средства во износ од 46.593.866,00 денари на сметката на Црвениот крст, по направените проценки кои се во тек, за тежината на повредите и прогнозите за времетрање на лекувањето и потребите на повредените, направени од стручни и компетентни институции во државата, а со цел објективизација и постигнување на целите и задоволување на реалните потреби на настраданите лица, Црвениот крст навремено ќе пристапи кон распредлба на средствата, за што благовремено ќе информираме“, соопштија од Црвениот крст.
