Фото: Принтскрин
Скопската полиција води истраги по две одвоени пријави за тешки кражби извршени во објекти на верски заедници во текот на изминатите денови, во кои биле украдени разни предмети, вклучително и ѕвоно од црковна камбанарија.
Првиот случај бил пријавен на 19 мај 2025 година во 09:00 часот во СВР Скопје. Според пријавата, во периодот од вечерта на 18 мај до утринските часови на 19 мај, непознат сторител со употреба на физичка сила и соодветен алат влегол во објект лоциран во дворот на црква во селото Сопиште. Од таму биле одземени повеќе предмети, меѓу кои и ѕвоно од црковната камбанарија.
Само еден ден подоцна, на 20 мај во 10:00 часот, била пријавена уште една кражба, овојпат во црква на подрачјето на Центар, во Скопје. Според пријавеното, инцидентот се случил на 18 мај, во периодот помеѓу 17:00 и 17:45 часот. Крадецот, повторно користејќи физичка сила и погоден алат, успеал да влезе во објект во кругот на црквата и од таму да одземе вреден предмет.
