Фото: Принтскрин
Американскиот претседател Доналд Трамп и рускиот лидер Владимир Путин денеска остварија телефонски разговор кој траеше речиси два часа, при што главна тема беше војната во Украина и можностите за постигнување траен мир.
Според информациите пренесени од новинската агенција ТАСС и мрежата Си-Ен-Ен, Путин го оцени разговорот како „отворен и суштински“, истакнувајќи дека двете страни покажале подготвеност да се разгледаат мирољубиви решенија за конфликтот.
„Претседателот Трамп го изложи својот став во однос на прекин на огнот, а јас подвлеков дека Русија останува посветена на пронаоѓање мирно и одржливо решение за украинската криза. Се работи за тоа да се дефинираат најпрактичните и најефикасните чекори до мир“, кажа Путин.
Тој додаде дека Москва поддржува прекин на борбените дејства, но дека тоа може да стане реалност само доколку претходно бидат постигнати суштински договори меѓу страните.
„Русија планира да иницира и да понуди рамка за соработка со Украина во форма на меморандум, кој ќе ги опфати клучните точки од можниот мировен договор. Тоа вклучува договорени принципи на решението, временска рамка, како и евентуален временски ограничен прекин на огнот“, изјави Путин.
