Фото: Aleksandar Eftimov
Македонската таеквондо репрезентативка Милијана Рељиќ забележа одличен настап на Европскиот Президент Куп што се одржа во Софија, Бугарија, каде успеа да се пласира на високото петто место во категоријата до 62 килограми.
Во конкуренција од дури 36 натпреварувачки, Рељиќ беше на само една победа од освојување на медал на овој престижен Г-3 турнир.
Таа ја започна својата победничка серија со сигурен триумф над хрватската натпреварувачка Лена Динковиќ, славејќи со 2:0 во рунди.
Во втората борба, Релиќ ја совлада и турската претставничка Алејна Семнјурт, повторно со убедливо 2:0. Медалот ѝ „избега“ во четвртфиналната пресметка со уште една хрватска таеквондистка – Ивана Арелиќ – каде што по голема борба загуби со минимални 2:1 во рунди.
Следниот предизвик за младата македонска олимпијка ја очекува веќе следниот викенд, кога ќе настапи на Солун Опен – турнир од категорија Г-1.
