Фото: Принтскрин
За многумина граѓани на Србија, животот во скандинавските земји претставува сон и идеал за подобра иднина. Но поранешниот фудбалер Ѓорѓе Исаиловиќ направил сосема поинаков избор – наместо да остане во студената Норвешка, каде што имаше спортска кариера, решил да се врати во родната Шумадија и животот да го посвети на село и земјоделие.
Неговата приказна е вистинска инспирација – фудбалската топка ја заменил со земјоделски алат, а наместо на стадион, денес најчесто може да се сретне на фармата каде со голема љубов одгледува свињи. Исаиловиќ вели дека уште за време на својата активна кариера имал јасен план: по завршувањето на спортскиот пат, да се врати во родното село и таму да го изгради својот втор живот.
„Селото е мојата втора најголема љубов во животот. Уште од млад бев уверен дека таму ќе го поминам остатокот од моите денови. Тоа не беше бегство, туку враќање дома – со јасна цел и план,“ раскажува Ѓорѓе со видлива гордост.
На својот имот, наследен од дедо му, се посветил на одгледување на традиционалната српска раса – моравски свињи. Токму таа посветеност и љубов кон автохтоната раса му ја донесе титулата „Најдобар млад фармер во Србија“. Исаиловиќ објаснува дека изборот не бил случаен – оваа раса е дел од неговото семејно наследство.
„Уште од дете се сеќавам на моравските свињи во нашето домаќинство. Мојот дедо ги одгледуваше, и уште тогаш научив многу за нив. Тоа се скромни животни, не бараат многу, а се приспособени на нашите услови. Одлуката да се вратам токму на нив беше логична и емотивна,“ додава тој.
