Фото: Принтскрин
Премиерот Христијан Мицкоски на денешната заедничка прес-конференција со претседателот на Европскиот совет, Антонио Кошта, упати критички осврт кон досегашниот тек на евроинтеграцискиот процес на Македонија, нагласувајќи дека земјата досега направила значителни и болни отстапки во име на европската иднина, но дека конкретен напредок сè уште изостанува.
„Очекувам да видиме процес кој ќе се одвива како двонасочна улица – ако е тоа воопшто возможно. Македонија направи многу во име на европските интеграции – го сменивме знамето, го сменивме името, го менувавме и Уставот, како ниедна друга држава. Патот кон ЕУ е тежок и фрустрирачки, но за нас тој пат сè уште не започнал во вистинска смисла. Сè уште сме таму каде што бевме пред две децении“, рече Мицкоски.
Претседателот Кошта, одговарајќи на прашање околу можноста за нови услови од Бугарија, повтори дека Европската Унија останува на ставот дека нема простор за нови барања. „Она што е договорено – тоа треба да се исполни. Веќе нема простор за дополнителни услови. Сега е моментот да се испорача договореното“, порача Кошта.
Мицкоски во своето обраќање се осврна и на самиот процес на прифаќање на францускиот предлог во 2022 година, кој, како што рече, бил усвоен од тогашната влада предводена од СДСМ и ДУИ, при што бил заобиколен Парламентот.
„Тој предлог беше прифатен без демократска дебата и без вклучување на Собранието, каде што за уставни измени се потребни две третини. Нашата позиција е принципиелна – нема да одиме понатаму без да видиме искрена волја и конкретна испорака од бугарска страна. Не можеме ние постојано да правиме чекори, да менуваме Устав, а од другата страна да нема ништо“, истакна Мицкоски.
