„Колку пари се фрлени за маминото синче Васил да не одлежи казна“, прашува сестрата на Фросина

Росица Кулакова, сестрата на трагично починатата Фросина Кулакова, која беше прегазена на пешачки премин во близина на Силбо во Скопје, се огласи јавно преку својот профил на Фејсбук по контроверзната одлука на Врховниот суд.

Судот ја укина претходно донесената пресуда на Апелациониот суд во Скопје, со која Васил Јованов беше осуден на три години и десет месеци затвор за кривични дела поврзани со поседување и трговија со дрога.

„Правосудната мафија не спие! Темните тунели на корупцијата се пофрекфентни од било кога. На 7-ми Мај, шуш-муш, Врховен суд му ја укинува пресудата на убиецот Васил од 3г. и 10 месеци за дрогата, што во денешната пресуда е земена како отежнителна околност. И сега апелација, без таа пресуда, ќе мора да ја намали казната. Таа отежнителна околност ја нема! Какви валкани игри се играат и колку пари се имаат фрлено за мајчиното синче да не си ја одлежи заслужената казна. Какво холивудско сценарио, навистина не можам да си поверувам“, пишува Росица.