ДУИ бара Албанец за гувернер на Народна банка на Македонија

Демократската унија за интеграција (ДУИ) преку јавно соопштение ја изрази својата загриженост и незадоволство од, како што наведуваат, целосната негрижа на институциите кон прашањата поврзани со правичната застапеност на Албанците во општествениот живот.

Според партијата, ниту Владата, ниту Претседателката на државата, па дури ни останатите претставници од политичката елита, не покажуваат ниту минимален интерес за обезбедување соодветно и достоинствено учество на Албанците во клучните општествени и институционални процеси.

„На 21 мај ќе се гласа за избор на нов гувернер на Народна банка на Македонија, а никој веќе не ја ни спомнува можноста на оваа позиција да биде избран Албанец. Сите се однесуваат како оваа функција да е резервирана за етничките Македонци и како да е тоа однапред завршена работа. Во моментов, во потесниот круг за избор влезени се четворица кандидати, од кои не само што ниту еден не е Албанец, туку овој потесен круг на ниту еден начин не го изразува мултиетничкиот карактер на државата“, велат од ДУИ.