ФФМ ја намали казната на Шкендија за исвиркувањето на настраданите во Кочани

Македонскиот шампион, ФК Шкендија од Тетово, објави дека Фудбалската федерација на Македонија (ФФМ) ја преиспитала и делумно ја укина претходно изречената казна за клубот, изречена поради инцидент поврзан со однесувањето на нивните навивачи.

Казната беше изречена од страна на Дисциплинската комисија при ФФМ, откако дел од домашната публика не ја испочитуваше минутата молк посветена на жртвите од трагедијата што неодамна се случи во Кочани. Според првичната одлука, Шкендија требаше да одигра пет натпревари без присуство на публика, како дисциплинска мерка за прекршувањето.

Меѓутоа, клубот денеска соопшти дека казната е ублажена и дека навивачите ќе имаат можност да присуствуваат на последниот меч од сезоната, на кој Шкендија официјално ќе ја прослави шампионската титула.

„По одлуката на Дисциплинската комисија по мечот против Брера, каде што група навивачи не ја почитуваа минутата молчење пред почетокот на натпреварот, нашиот клуб беше казнет со играње пет натпревари без публика. Оваа санкција значеше завршување на сезоната како домашен тим без навивачи на трибините. Сепак, по поднесената жалба од Шкендија, Комисијата за жалби при ФФМ одлучи да го прифати нашето барање со ублажување на дисциплинската мерка, казната е намалена од пет на четири натпревари без публика“, соопшти Шкендија.