Одливот на здравствен кадар повторно стана една од најгорливите теми во македонското општество. Според податоците на Здружението на медицински сестри „За нас“, само во текот на изминатата година, околу 2000 медицински сестри ја напуштиле земјата и заминале кон држави од Европската Унија, во потрага по подобри работни услови и повисоки примања.
Овој алармантен тренд, кој зема сè поголем замав, се должи на сериозни системски проблеми во домашниот здравствен сектор. Ниските плати, ограничените можности за професионален напредок, преоптовареноста со работа и сè поголемата одговорност, се дел од причините поради кои медицинскиот персонал се решава на живот и работа во странство.
Здружението предупредува дека ако не се преземат итни и суштински мерки, здравствениот систем е во реална опасност од колапс. Прашањето „Кој ќе остане да нè лекува?“ станува сè поактуелно и заслужува сериозен одговор од институциите.
