Фото: Македонски Железници Транспорт АД Macedonian Railways Transport JSC
Многу брзо граѓаните на Скопје и околните населени места ќе добијат ново транспортно решение – „Градскиот воз“, најави премиерот Христијан Мицкоски, оценувајќи го проектот како важен чекор кон модернизација и подобрување на јавниот сообраќај во метрополата.
Мицкоски истакна дека станува збор за иницијатива од Министерството за транспорт, која претставува дел од пошироките напори за реформа на системот, не само во транспортниот сектор, туку и на општествено ниво.
„Се обидуваме систематски да ја вратиме државата на здрави нозе. Не станува збор за мала корекција, туку за целосна обнова – сѐ треба да се реформира. Она што го затекнавме беше држава без основен функционален систем. Денес, само една година подоцна, состојбата е значително поинаква“, изјави премиерот.
Паралелно, вицепремиерот и актуелен министер за транспорт, Александар Николоски, минатата недела најави дека првата траса на „Градскиот воз“, која ќе ги поврзува Зелениково, Драчево, Кисела Вода, Аеродром и Центар (Нова железничка станица), се очекува да биде пуштена во употреба до крајот на оваа година.
