Откриено што се случувало ноќта пред нападот врз српскиот бизнисмен

Саша Мирковиќ, сопственик и директор на „Хајп Продакшн“ и телевизијата „Хајп ТВ“, излезе со сериозни обвинувања против менаџерот за забава Велибор Поповиќ Поп, тврдејќи дека бил физички нападнат од негова страна пред еден загребски хотел.

Мирковиќ се наоѓал во хрватската метропола по повод концертот на српската пејачка Ана Николиќ. На настанот бил во друштво на композиторот Горан Ратковиќ – Рале, кој воедно е и емотивен партнер на пејачката. Целта на нивното присуство, според Рале, била да ѝ дадат поддршка на Николиќ за време на нејзиниот настап. Како што тврдат, не претпоставувале дека вечерта ќе заврши со несакан инцидент.

Во изјава за српскиот медиум „Курир“, Ратковиќ откри дека Мирковиќ го напуштил клубот околу четири часот по полноќ, додека останатите членови од нивната придружба сè уште се забавувале.

– Престојот на Саша на концертот беше сосема коректен. Сите заедно уживавме во одличната атмосфера, клубот беше преполн и луѓето беа воодушевени. После настапот вечеравме, а потоа Саша реши да си замине малку порано. Никој од нас не можеше да претпостави дека нешто слично ќе се случи. Информацијата за инцидентот ја дознавме од медиумите – изјави Ратковиќ.

Тој додаде дека обезбедувањето на Ана Николиќ се чувствува виновно што не го придружило Мирковиќ при неговото заминување, бидејќи веруваат дека тоа можело да го спречи нападот.

– Саша е познат по својот коректен однос со соработниците, па тешко е да се поверува дека причината за нападот имала професионален карактер. Повеќе ми личи на личен конфликт – рече композиторот.

Сè уште нема официјална изјава од Велибор Поповиќ, ниту детали од полицијата за евентуално поднесена пријава.