Фото: Принтскрин/Телевизија Стар
Во врска со убиството што неодамна се случи во централното градско подрачје на Штип, Основното јавно обвинителство отвори постапка против пет лица. Според досегашните информации, главниот осомничен – 21-годишен турски државјанин – престојувал илегално во државата, исто како и уште еден од неговите соучесници. За разлика од нив, останатите тројца осомничени, меѓу кои и една жена, имале регулиран престој во Македонија и активно учествувале во планирањето на крвавиот инцидент.
Истражителите се сомневаат дека осомничениот убиец го набавил огненото оружје – пиштол без сериски број и избришани податоци за моделот – во главниот град, Скопје, за сума од 1.110 евра. Оружјето било купено од засега непознато лице.
„Преку мобилни апликации се договориле со жртвата да се сретнат за наводно да ги надминат долготрајните недоразбирања меѓу нив. Но, по 15-минутен разговор во угостителскиот објект, осомничениот влегол во тоалетот и веднаш излегол, па на вратата која го дели отворениот од затворениот дел од кафулето го извадил пиштолот и испукал неколку куршуми во правец на оштетениот, нанесувајќи му повеќе огнострелни повреди од кои подоцна починал“, велат од Обвинителството.
Напаѓачот и неговите соучесници побегнале од местото на злосторството со возило од марката BMW, управувано од жената која, според обвинението, била дел од претходно договорениот план. Таа, како и другите учесници, се на возраст меѓу 22 и 28 години.
