Васил пред да ја прегази Фросина возел цик-цак и поминал на две полни ленти

На првото рочиште од судскиот процес, јавниот обвинител Александар Марковски истакна дека ќе докаже оти Васил Јованов, возачот кој ја прегази и усмрти Фросина Кулакова на обележан пешачки премин, не ја предизвикал несреќата по невнимание, туку со умисла. Во воведниот збор, Марковски нагласи дека станува збор за сериозно кривично дело со најтешка квалификација во областа на сообраќајните престапи.

„Ова не е класичен сообраќаен инцидент во кој случајно маж ја удира жена. Ова е резултат на серија свесни прекршувања на сообраќајните правила кои водат до фатален исход“, изјави обвинителот.

Марковски истакна дека ќе изнесат докази за тоа дека веднаш пред фаталниот момент, возачот Јованов направил повеќе прекршоци, меѓу кои и опасно менување правец на движење, т.н. „цик-цак“ возење и преминување преку две полни линии.