Фото: Принтскрин
На 7 мај 2025 година, околу 23:45 часот, на улицата „Прохор Пчински“ во Велес, полициски службеници од СВР Велес го привеле 50-годишниот С.Д. од Велес, информира Министерството за внатрешни работи.
С.Д. управувал патничко моторно возило марка „Сеат“ со велешки регистарски ознаки, и тоа без да поседува возачка дозвола. Притоа, на улицата „Димитар Влахов“ во градот предизвикал сообраќајна несреќа удирајќи во автомобил „Опел“, управуван од 44-годишниот Р.И., исто така од Велес.
Без да застане по инцидентот, тој продолжил да се движи низ градските улици и на улицата „Петре Прличко“ удрил во заштитната рампа на автобуската станица. И покрај ова, возачот не се обидел да запре, па на улицата „Јордан Хаџи Константинов Џинот“ удрил и во паркиран автомобил марка „Тико“, соопштија од МВР.
По преземените оперативни мерки, полицијата го лоцирала и сопрела возачот, а направената алкотест контрола покажала присуство на 2,16 промили алкохол во крвта.
