Татко избодел две ќерки и сопругата, едната од нив починала, другата се бори за живот – ужас во Призрен!

Основниот суд во Призрен му одреди 30-дневен притвор на турскиот државјанин М.Г., кој привремено престојува во Призрен, поради сериозни сомнежи дека извршил свиреп напад врз сопругата и двете малолетни ќерки.

Инцидентот се случил во раните утрински часови во вторникот, околу 6 часот, веднаш по утринската молитва. Според наводите од истрагата, осомничениот употребил нож од типот „бајонет“ и ги нападнал членовите на семејството додека спиеле во својот дом.

Последиците од нападот се трагични – 15-годишната ќерка починала на самото место од здобиените повреди, додека 10-годишното девојче е во тешка, животно загрозувачка состојба и е хоспитализирано. Сопругата на осомничениот, исто така сериозно повредена, се наоѓа на болничко лекување.

Надлежното обвинителство тврди дека М.Г., на возраст од околу 45 години, со предумисла го извршил нападот, поради што побара притвор со цел спречување на евентуално бегство и поради тежината на сторените дела.

Судот го прифати предлогот на обвинителството и му одреди притвор до 5 јуни. Против него се води истрага за три тешки кривични дела: „Тешко убиство“, „Тешко убиство во обид“ и „Неовластено држење и употреба на оружје“, согласно со Кривичниот законик на Република Косово.