Македонец се претставил како „доктор“ и измамил жртви во Хрватска за сума од 278.500 евра

Хрватската полиција води истрага против 26-годишен државјанин на Македонија, кој е осомничен за учество во серија измами што се случиле во периодот од 9 до 30 април оваа година.

Според соопштението на загрепската полиција, осомничениот наводно делувал во координација со уште две неидентификувани лица – едно машко и едно женско.

Досегашната истрага укажува дека измамите биле изведувани по добро испланиран шаблон: одредени лица, лоцирани на територија на Романија, се јавувале телефонски на хрватски граѓани претставувајќи се како медицински лица од болницата во Загреб. Во некои случаи, измамниците оделе чекор понатаму, тврдејќи дека се лекари во реномирана американска здравствена установа.

Целта на овие лажни повици била да се измамат граѓаните и да им се изнудат парични средства под изговор на итна медицинска интервенција или третман за блиско лице. На овој начин, според проценките на истражните органи, тројцата осомничени оштетиле повеќе граѓани и прибавиле незаконска материјална корист во вкупен износ од 278.850 евра.