Фото: Принтскрин
Јавното обвинителство објави нови, вознемирувачки детали за вчерашното свирепо убиство што се случи во скопската населба Шуто Оризари. Осомничен за делото е 39-годишен скопјанец, кој бил уапсен при обид да ја напушти државата преку граничниот премин Табановце.
Според обвинителството, убиството се случило во текот на вчерашниот ден во семејниот дом, каде осомничениот живеел во вонбрачна заедница со жртвата. За време на семејна расправија, тој ѝ нанел смртоносни убодни рани со нож во пределот на вратот и градниот кош. Нападот се случил во присуство на нивната петгодишна ќерка, што дополнително ја зголемува трагичноста на настанот. Жената починала на самото место од здобиените повреди.
По стореното злосторство, осомничениот веднаш побегнал од местото на настанот. Во бегството му помогнало друго лице – второосомничениот во случајот – кој му обезбедил нова облека за да ги сокрие трагите и го транспортирал со автомобил до границата со Србија.
Како што соопшти обвинителството, помагачот го оставил првоосомничениот во близина на граничниот премин Табановце, а потоа се вратил назад во Скопје, каде се обидел да ги избрише доказите за својата улога во бегството.
Сепак, обидот за бегство не успеал – осомничениот бил фатен и приведен од граничната полиција. Против двајцата е поведена истрага за тешко кривично дело – убиство и помагање во бегство по сторен тежок криминал.
