Тошковски: Неслучајно ги организираа луѓето од Кочани да дојдат, не знам каде ќе им оди душата на политичките лешинари

Министерот за внатрешни работи, Панче Тошковски, изрази сомневање дека доаѓањето на група родители од Кочани во Собранието, токму на денот кога се расправаше за неговата интерпелација, не било сосема спонтано.

Во својата изјава за медиумите, Тошковски нагласи дека чувствува длабока горчина и срам што е дел од општество во кое, како што рече, политички субјекти се обидуваат да капитализираат на човечка трагедија. Министерот посочи дека се срами што е дел од општество во кое опозиција сака преку солзи на родители кои изгубиле чедо, да добие лајк на социјални мрежи.

„Секој еден Македонец кој што го следеше оној ден со интерпелацијата… Што сакаат, да веруваат дека не случајно ги организираа луѓето да дојдат на денот на интерпелацијата, а дел од тие луѓе не знаеа дека има интерпелација за министер за внатрешни работи? Не случајно имаше списоци кај одредени луѓе коишто поставуваа одредени прашања, кои беа поставувани како што беа поставувани. Јас не знам каде ќе им оди душата на овие… ништо не можам да кажам друго освен политички лешинари со овие дејства кои очигледно ги преземаа?“, кажа Тошковски во „Вечерното шоу“ на Богдан Илиевски.