Од мај ќе се наплаќа влез со возила во Национален парк Шар Планина – 150 денари за автомобил, 450 за тешки возила

Од 2 мај 2025 година, Националниот парк Шар Планина започнува со имплементација на нов систем за наплата на влез за моторни возила.

Сите посетители кои ќе се движат со моторни возила по дозволените патишта низ територијата на паркот ќе треба да извршат уплата преку испраќање СМС порака или скенирање на специјално поставен QR-код.

„Со праќање на СМС порака за влез на моторното возило, Вие директно придонесувате кон заштитата на природата на Шар Планина и помагате во зачувувањето на ова уникатно природно богатство за идните генерации. Стратешките заложби на ЈУ Национален парк Шар Планина се насочени кон тоа на посетителите кои не оставаат еколошки отпечаток да не им се наплатува влез во Националниот парк“, се вели во денешното соопштение на НП Шар Планина.