Фото: Принтскрин
Посмртните останки на славниот фудбалер и тренер Синиша Михајловиќ беа неодамна ексхумирани и пренесени од првобитното место на погребување, по одлука и желба на неговото семејство. Со согласност на градските власти на Рим, новото вечно почивалиште на Михајловиќ се наоѓа во Алејата на Великите на монументалните гробишта Верано.
Овој импозантен простор, сместен во близина на базиликата Сан Лоренцо, важи за вистински музеј под отворено небо, исполнет со уметнички и архитектонски споменици. Тука се погребани истакнати личности од различни сфери на животот, култури и религии – и токму тука, меѓу бесмртните имиња, сега се наоѓа и Синиша Михајловиќ.
Неговиот гроб се наоѓа на живописно, мирно место – осветлено со природна светлина, опкружено со зелена вегетација, рози и веднаш под висока палма. На гробот се наоѓа и навивачки шал, оставен од верните фанови како последен поздрав до човекот кој го обожаваа и го следеа низ целата негова кариера.
