Пријава за македонски директор – вработените користеле неисправни и нерегистрирани возила

Надворешната канцеларија за криминалистички работи во Делчево поднесе кривична пријава до Основното јавно обвинителство против лицето С.С. (60) од Делчево, поради основано сомнение за сторени две кривични дела: „злоупотреба на службената положба и овластување“ (член 353) и „несовесно работење во службата“ (член 353-в), во согласност со член 45 од Кривичниот законик.

Според податоците од истрагата, пријавениот, кој ја извршувал функцијата директор на Јавното комунално претпријатие „Брегалница“ – Делчево, во периодот од 31 јули 2024 до 24 март 2025 година, свесно и намерно дозволувал користење на службени возила кои не биле технички исправни ниту регистрирани, иако бил должен да постапува согласно законските прописи.

При спроведените контроли од страна на полициските службеници на ОВР Делчево било утврдено дека неколку возила не биле регистрирани подолг временски период, за што биле издадени повеќе прекршочни платни налози во вкупен износ од 50.909 денари.

Сумата за казните, наместо да ја сносат одговорните лица, била покриена од буџетот на претпријатието, со што на институцијата ѝ била нанесена директна финансиска штета.