За време на велигденските празници, во домот на пратеникот Фатмир Битиќи, лоциран во скопската населба Бутел, е извршена тешка кражба од засега непознати сторители. Настанот бил пријавен во Секторот за внатрешни работи Скопје на 21 април, во 11:40 часот.
Пратеникот Битиќи во изјава за „ТВ24“ потврди дека инцидентот траел само неколку минути, а сторителите биле регистрирани од безбедносниот систем инсталиран во неговиот дом.
„Сè се случи во период од околу три и пол до четири минути. Во домот имам алармен систем и видео надзор. Камерите снимија три лица – две лица влегуваат во куќата, додека едно останува надвор, најверојатно на стража. Тие буквално го откорнале металниот сеф што беше вграден во ѕид. Во него имаше пари, но и накит со голема емотивна и семејна вредност. Агенцијата за обезбедување поврзана со алармот реагираше по околу шест минути од упадот“, изјави Битиќи.
