Неверојатен инцидент со среќен крај се случи во грчкиот град Патра, непосредно пред Велигден, кога млада докторка чудесно ја преживеа тешката сообраќајна несреќа со воз. И покрај страшниот удар, таа се очекува целосно да закрепне, што многумина го нарекоа вистинско велигденско чудо.
Д-р Виви Лукопулу, специјалистка која токму се враќала дома по 36-часовна напорна смена во болницата „Св. Андреј“, се нашла во критичен момент на прелез каде рампата била спуштена.
Според локалниот медиум „Прототема“, и покрај предупредувањата, нејзиното возило, од засега неразјаснети причини, завршило на шините.
Во тој момент се приближувал воз со голема брзина. Докторката се обидела да го забрза автомобилот за да го избегне судирот, но немала доволно време.
Камерите за надзор го регистрирале моментот на жестокиот удар – возот со полн замав удира во автомобилот, кој бил фрлен неколку метри подалеку и целосно уништен.
