Фото: Venko Krstevski
Градоначалникот на Кочани, Венко Крстевски, преку објава на својата официјална страница на Фејсбук, ја сподели загриженоста за ситуацијата во ЈЗУ Општа Болница Кочани.
Тој посочи дека дел од медицинскиот персонал добил намалување на платата поради користење на боледување – и тоа токму по трагичната ноќ на 16 март, кога избувна разорниот пожар во дискотеката „Пулс“, при што овие здравствени работници биле во првите редови, спасувајќи човечки животи.
Крстевски истакнува дека болницата се соочува со сериозен недостиг на основни услови за работа, како и со отсуство на неопходна медицинска опрема.
„На прашањето ,,Знаеш ли на што си се нафатил?” Општина Кочани еден месец без Градоначалник и Секретар, општинските инспектори под мерки за претпазливост, финансиските служби под тотално непотребна репресија, лоша клима за работа. КЈП Водовод Кочани две недели без директор и три месеци без технички. Долг над 3 милиони евра, дефицитарен кадар во делот на оперативци и општ хаос создаван со децении. Школите тонат во долгови, над 200 деца во предучилишна возраст чекаат ред за запишување во градинка. Територијалната противпожарна единица со број на вработени на половина од законскиот минимум, опрема лимитирана, возен парк дотрајан во лоша кондиција и просечна старосна граница од 46 години. Полициска станица Кочани поради сите настани, суспензии, истраги, реално не е ниту на 20 проценти од капацитетите. Ќе си дозволам да цитирам еден голем идеолог ,,Јас имам сон!”. Ве повикувам и охрабрувам да дадете придонес за остварување на овој сон, кој верувам дека е желба на сите млади и возрасни жители на Кочани. Споделете го овој статус сите кои можете, за да дознае цела јавност“, напиша Крстевски.
Фото: Venko Krstevski
