Фото: Принтскрин
По трагичниот инцидент што се случи во дискотеката „Пулс“ во Кочани на 16 март, каде што беа повредени 193 млади лица, најновите податоци покажуваат дека 45 од повредените пациенти се наоѓаат на лекување во здравствени установи во странство.
Во текот на денешниот ден, се очекува еден од пациентите кој се лекувал во Ниш да биде вратен во земјава и да биде згрижен на Клиниката за хируршки болести „Свети Наум Охридски“ во Скопје.
Од вкупно шеесетината пациенти кои се хоспитализирани во домашните болници, дел ќе бидат пуштени на домашно лекување во наредните денови, откако нивната здравствена состојба ќе дозволи тоа.
Несреќата досега одзеде 62 животи, а според последните информации од здравствените власти, двајца од повредените и понатаму се во критична состојба, со сериозни повреди кои бараат постојан медицински надзор.
