Фото: Принтскрин
Научници од Универзитетот Кембриџ во Велика Британија открија потенцијални, но сè уште недоволно потврдени знаци кои би можеле да укажуваат на постоење на живот на егзопланетата K2-18b – планета која се наоѓа на оддалеченост од околу 1,1 билион километри од Земјата.
Истражувачкиот тим користел податоци од вселенскиот телескоп Џејмс Веб на НАСА за да ја проучи атмосферата на оваа далечна планета. Во анализата биле идентификувани молекули кои, барем на Земјата, се создаваат исклучиво преку биолошки процеси, најчесто од страна на едноставни микроскопски организми.
Ова е втор пат досега да се откријат траги од вакви супстанции на K2-18b, а моменталните резултати се најмногу ветувачки досега. Сепак, научниците предупредуваат дека потребни се дополнителни анализи за да се донесе цврст заклучок.
Тимот од Кембриџ анализирал како светлината од ѕвездата домаќин се филтрира низ атмосферата на планетата при нејзиното орбитирање. Притоа биле детектирани хемиски траги од најмалку една од две молекули поврзани со животот: диметил-сулфид (DMS) и диметил-дисулфид (DMDS) – соединенија кои на Земјата ги произведуваат морски фитопланктони и бактерии.
„Количината на овие гасови што ја проценуваме во атмосферата на K2-18b е илјадници пати поголема од онаа на Земјата,“ изјави професорот Никку Мадхусудан, кој го води истражувањето. „Ако се покаже дека навистина потекнуваат од биолошки извор, тогаш оваа планета потенцијално може да изобилува со живот.“
Сепак, научната заедница останува претпазлива. Моменталната статистичка сигурност на резултатите изнесува околу 99,7% (т.н. три сигма), но за да се смета за научно откритие, потребна е точност од најмалку пет сигма – што претставува речиси апсолутна сигурност од 99,9999%.
