Фото: Принтскрин
По поднесената кривична пријава од страна на Министерството за внатрешни работи, јавен обвинител од Специјализираното одделение кое се занимава со гонење на кривични дела извршени од лица со полициски овластувања и припадници на затворската полиција, издаде наредба за отпочнување на истражна постапка против десетмина полициски службеници.
Согласно со собраните докази и извршените првични проверки, постои основано сомнение дека во периодот од 7 декември 2012 година до 21 јануари 2022 година, осомничените, дејствувајќи како соизвршители, се инволвирани во извршување на кривичното дело „Тешки дела против општата сигурност“.
„Според описот содржан во наредбата за спроведување истражна постапка, осомничените како службени лица вработени во СВР Штип и ПС ОН Кочани, во погоренаведениот временски период, како соизвршители, не постапиле според прописите за мерките за заштита – не извршиле целосна и детална проверка во врска со издавање на позитивна согласност за издавање лиценца за Кабаре „ПУЛС“, во делот на безбедноста во сообраќајот и јавниот ред и мир. Со издавањето на согласностите сите заедно му овозможиле на правното лице да се стекне со лиценца за вршење угостителска дејност, иако истото не ги исполнувало предвидените услови.
Јавниот обвинител ценејќи ги околностите и доказите прибавени во предистражната постапка, а заради непречено водење на кривичната постапка и заради обезбедување присуство на осомничените, на судијата на претходна постапка при Основен кривичен суд Скопје ќе предложи на седуммина осомничени да им определи мерки на претпазливост. Останатите тројца осомничени се обезбедени со претходната постапка.
Специјализираното одделение за гонење на кривични дела сторени од лица со полициски властувања и припадници на затворската полиција продолжува со предистражни дејствија во насока на откривање на нови лица инволвирани во случајот“, соопшти Јавното обвинителство.
