Фото: Принтскрин
Во Секторот за внатрешни работи Скопје, 24-годишна жена поднела пријава во која тврди дека заедно со нејзиниот сопруг станале жртви на измама од страна на женско лице, која им нанела финансиска штета во износ од околу 824.000 денари.
Според наведеното во пријавата, осомничената се претставила како адвокат и како сопственичка на правно лице со седиште во Битола. Таа ги уверила брачниот пар дека може да им овозможи поволно купување на стан кој наводно бил предмет на јавна лицитација. Се претпоставува дека ги довела во заблуда тврдејќи дека е доволно тие да учествуваат со 30% од вкупната вредност на станот, додека преостанатите 70% – според нејзиното уверување – би биле покриени од државни средства.
Во текот на реализацијата на оваа наводна зделка, парите во три наврати ѝ биле предадени лично на неа и на уште едно лице кое било присутно при трансакциите. Дополнително, оштетените ѝ доставиле и лични податоци, вклучувајќи изводи од матичната книга на родените и копии од нивните лични карти.
