Фото: Принтскрин
Комерцијална банка одлучи да одвои финансиска поддршка во висина од 30 милиони денари за Фондацијата „Заедно за едно“ при Македонската банкарска асоцијација, со цел да помогне на повредените и на семејствата на настраданите во трагичниот пожар кој неодамна се случи во дискотеката во Кочани.
Како компанија со длабоко вкоренето чувство за општествена одговорност, Комерцијална банка ја насочува оваа донација како конкретен израз на солидарност и поддршка во моменти кога најмногу е потребна. Средствата се наменети за 2025 година, а Банката најавува дека и во иднина, зависно од развојот на околностите и потребите на погодените семејства, ќе се разгледуваат и донесуваат дополнителни одлуки за натамошна помош.
„Убедени дека во моменти на голема болка и тага, солидарноста, заедништвото и хуманоста создаваат надеж, Комерцијална банката е и еден од основачите на Фондацијата „Заедно за едно“, која има за цел да обезбеди долгорочна финансиска поддршка и грижа за настраданите лица и за нивните најблиски.
Финансиските средства ќе бидат наменети за задоволување на основните потреби (храна, облека, сместување, лекови), покривање трошоци за медицински третмани, операции и рехабилитација, поддршка на менталното здравје, како и за стипендии и грантови за поддршка во образованиот процес и во професионалната реинтеграција на настраданите.
Како докажан поддржувач на општеството и на граѓаните, Комерцијална банка останува цврсто посветена на својата мисија да биде двигател на позитивни промени и на поддршка за заедницата, особено во тешки времиња кога сочувството и емпатијата помагаат барем малку да се ублажат болката и последиците.
Сите потребни информации за семејствата на починатите и на повредените лица да ја добијат неопходната финансиска помош ќе бидат објавени на веб-страницата mba.mk.“, се вели во соопштението.
