Таравари: 57 лица се лекуваат во Скопје и странство, двајца пациенти се во критична состојба

Министерот за здравство Арбен Таравари денеска соопшти дека вкупно 57 пациенти, повредени во трагичниот пожар што ја потресе Кочани, сè уште се на болничко лекување – дел од нив во здравствени установи во Македонија, а дел во странство.

Во главниот град Скопје моментално се згрижени деветмина повредени. Според информациите од министерот, двајца пациенти се хоспитализирани на Клиниката за пластична и реконструктивна хирургија, еден се лекува во ГОБ „8 Септември“, четворица се наоѓаат во старата градска болница, додека уште двајца се сместени на лекување во приватни здравствени установи.

Во однос на пациентите кои се пренесени на лекување во странски клиники, Таравари информираше дека двајца од нив се во критична состојба, додека останатите, иако со сериозни повреди, се веќе екстубирани и под континуиран медицински надзор.