Агенцијата за храна и ветеринарство (АХВ) спроведе засилени вонредни контроли низ целата држава во пресрет на Велигденските празници, при што беа уништени над 1.200 килограми небезбедни прехранбени производи, меѓу кои месо, јајца, мед, ракија и маслиново масло, како и други артикли кои не ги исполнуваат безбедносните и квалитативни стандарди.
Инспекциските служби открија значителни количини месо и месни преработки кои биле складирани или нудени за продажба во несоодветни услови, со што бил загрозен здравствениот аспект на храната што би се нашла на трпезите на граѓаните. Дел од производите биле со изминат рок, неадекватно декларирани или без потребната документација за потекло и квалитет.
„Официјалните ветеринари и инспекторите за храна на Агенцијата за храна и ветеринарство (АХВ) спроведуваат вонредни засилени контроли пред велигденските празници. Во рамки на спроведените 350 надзори на операторите со цел спречување на пласирање на небезбедна храна и нелегална трговија со јајца, бои за јајца, како небезбедни уништени се 1230 килограми различни видови производи, најмногу месо, преработки и подготовки од месо, но и јајца, бои, мед, ракија, маслиново масло и други призводи. А утврдените недоследности со вонредните контроли изречени се казни во висина од 3.650 евра во денарска противвредност и издадени се 22 решенија со наредби за нивно отстранување“, велат од АХВ.
