„Ниту една инспекција не стапнала во кочанската дискотека Пулс“, вели Коцевски

Обвинителството ја прошири истрагата за трагичниот пожар во дискотеката „Пулс“ во Кочани, во кој животите ги загубија 61 лице, а фокусот сега е насочен кон вкупно 45 физички лица и три правни субјекти, осомничени за системски пропусти кои довеле до катастрофалните последици.

Меѓу новоосомничените се и високи поранешни и актуелни функционери од институциите задолжени за безбедност и заштита. Меѓу нив е и актуелниот министер без ресор, Шабан Салиу, кој во периодот од 2008 до 2017 година ја водеше Дирекцијата за заштита и спасување. Под истрага се и неговиот наследник Аднан Џаферовски, како и сегашниот директор на институцијата, Џеват Селами.

Според изјавата на државниот јавен обвинител Љупчо Коцевски, постои основано сомневање дека тие долги години системски ги занемарувале своите законски обврски, не спроведувајќи надзор ниту во дискотеката „Пулс“, ниту во други слични објекти ширум државата.

„Во текот на повеќе години, без оглед на ризиците кои биле очигледни, не се преземале активности за следење, процена на ризик, ниту пак редовни инспекциски контроли врз угостителски објекти, меѓу кои дискотеки и кабареа. Тоа довело до небезбедни услови кои директно придонеле за трагичниот исход во Кочани“, изјави Коцевски на денешната прес-конференција.