Фото: Слободан Трендафилов
Зголемувањето на минималната плата и имплементацијата на одредбите од колективните договори беа клучни теми на денешниот состанок меѓу синдикатите и претставниците на Владата.
Како што изјави Слободан Трендафилов, претседател на Сојузот на синдикати на Македонија (ССМ), Владата не била против идејата за повисока минимална плата, но спротивставување дошло од два други синдикални субјекти кои биле присутни на состанокот.
Трендафилов посочи дека тие синдикати побарале да се укинат делови од Општиот колективен договор кои, според нив, го кочат растот на платите во јавниот сектор.
Од друга страна, претседателот на Конфедерацијата на слободни синдикати (КСС), Благоја Ралповски, ја критикуваше иницијативата на ССМ, нарекувајќи ја популистичка. Тој додаде дека зголемувањето на минималната плата на 30.000 денари би влијаело само врз ограничен број вработени, а не врз сите, како што се претставува во јавноста.
