Околу триста претставници од врвното раководство на Сојузот на синдикати на Македонија и гранковите синдикати одржаа јавна седница пред Работничкиот дом, по што тргнаа на протестен марш кон Владата. Маршутата ќе ги опфати и Собранието и Стопанската комора, како симболични станици во нивниот протест против ниските плати.
Нивниот револт ескалираше откако Владата остана без одговор на нивните барања, а последното зголемување на минималната плата за 1.800 денари, односно на околу 24.300 денари, не го сметаат за доволно.
Синдикатите инсистираат не само на минимална плата од 500 евра, туку и на зголемување на сите плати во државата за најмалку 6.000 денари. Протестот е предупредување дека доколку нема конкретни мерки, синдикатите се подготвени на порадикални чекори.
