По добиено известување од полициските служби, инспектори од Агенцијата за храна и ветеринарство (АХВ), во координација со Министерството за внатрешни работи, спровеле претрес во домот на лице чиј автомобил бил предмет на рутинска контрола. При проверката, полицијата открила значително количество кондиторски производи со поминат рок на траење.
Во рамките на инспекцијата, биле пронајдени 34 пакети флипс и 35 пакети оризови барови со различни вкусови, како и други видови грицки и кондиторски производи, со вкупна тежина од околу 250 килограми. По детална анализа, утврдено е дека производите се со истечен рок и како небезбедни биле веднаш одземени од страна на АХВ.
Според податоците од Агенцијата, овие производи биле набавени од различни магацини и нелегално се продавале на скопските пазари, вклучувајќи го пазарот за стари предмети во населбата Маџари и пазарот во Шуто Оризари.
Против одговорното лице е изречена парична казна во износ од 400 евра во денарска противвредност.
