Сојузот на синдикати на Македонија (ССМ) најави протест на 2 април пред државните институции, изразувајќи незадоволство од одлуката на Владата за зголемување на минималната плата за 1.812 денари, која, според нив, е донесена на незаконски начин.
Претседателот на ССМ, Слободан Трендафилов, истакна дека Законот за минимална плата прецизно го дефинира начинот на утврдување на нејзината висина и дека Владата не го почитувала законскиот механизам.
„Став 5 од член 4 на Законот за минимална плата вели дека министерот за труд и социјална политика, по претходно мислење на Економско-социјалниот совет, ја објавува висината на минималната бруто плата, усогласена согласно Став 1“, кажа Трендафилов.
Трендафилов упати критики кон пратениците, обвинувајќи ги дека со двонеделниот одмор избегнуваат расправа за барањето на ССМ за зголемување на минималната плата за 6.000 денари.
