Градоначалникот на Општина Центар, Горан Герасимовски, синоќа беше гостин во хуманитарната програма „Канал 5 и Македонија за Кочани“, каде граѓаните имаа можност телефонски да донираат средства за помош на настраданите од катастрофалниот пожар во Кочани.
За време на гостувањето во студиото на Канал 5 телевизија, Герасимовски испрати порака за солидарност, истакнувајќи дека во вакви тешки моменти е неопходно сите да се обединиме, да покажеме хуманост и заеднички да им помогнеме на оние кои се соочуваат со последиците од оваа несреќа. Тој нагласи дека во вакви ситуации политиката треба да се остави настрана и да се даде приоритет на човечноста и поддршката.
На прашање од новинарката дали Општина Центар веќе донирала средства, Герасимовски потврди дека општината веќе издвоила финансиска помош за погодените семејства. Дополнително, тој лично одлучил да даде свој придонес, донирајќи ја целата своја плата за настраданите.
„Во овие тешки моменти, во оваа болка со која сите ние се соочуваме да бидеме единствени, да бидеме сплотени, да не ги политизираме работите, да бидеме хумани и да помагаме на оние на коишто им е најпотребно во овој момент“, кажа Герасимовски.
