Фото: Принтскрин
Германскиот весник „Билд“ и неколку украински медиуми објавија дека хакерска група успеала да дојде до генетски информации поврзани со рускиот претседател Владимир Путин, откако извршиле упад во компјутерот на неговиот братучед, Михаил Путин.
Според наводите, хакерите успеале да се инфилтрираат во личните податоци на Михаил, кој во минатото направил ДНК-тест во московската компанија „Генотек“. Оваа компанија е специјализирана за анализа на генетско потекло и утврдување на можни здравствени ризици. Преку извештајот за неговиот ДНК-профил, хакерите наводно дошле до податоци кои можат да се поврзат и со генетското потекло на самиот Владимир Путин.
Според објавеното, научниците кои го анализирале добиениот извештај утврдиле дека Михаил Путин припаѓа на хаплогрупата E1b, поточно на подгрупата E-V13. Оваа хаплогрупа е исклучително ретка во Русија и ја поседува помалку од пет проценти од машкото население. За споредба, оваа генетска група е најчесто присутна меѓу популацијата на Балканот, особено во Албанија и Косово, каде што речиси секој втор маж припаѓа на E-V13.
Историските и генетските податоци укажуваат дека носителите на оваа хаплогрупа се потомци на човек кој живеел на Балканот пред неколку илјади години, во периодот на неолитот, кога почнале првите земјоделски заедници.
Иако е невозможно да се утврди со сигурност целосното потекло на рускиот претседател само врз основа на овие податоци, анализите отворија многу прашања и предизвикаа голем интерес на социјалните мрежи, каде што дел од корисниците шпекулираат дека Путин можеби има далечни балкански корени.
Засега нема официјална потврда од Кремљ или од засегнатите лица за вистинитоста на овие тврдења.
