Од април годинава, ќе се исплаќа новата минимална плата која е законски утврдена, а која ќе биде за околу 2.200 денари повисока од сегашната минимална плата, истакна премиерот Христијан Мицкоски.
Според неговите зборови, ако во наредните месеци работниците и работодавачите постигнат договор за понатамошно зголемување на минималната плата, ќе се пристапи кон промени во законодавството и дополнително коригирање на износот.
„Денеска имаме владина седница, разговарав со министерот за економија, ќе поминеме информација. Согласно Законот мислам дека минималната плата ќе се зголеми на ниво од 24 400, така е според Законот. Немаме репрезентативен синдикат во Економско-социјалниот совет, се формираше Комисија која ќе ја утврди репрезентативноста. Се надевам дека наскоро тие што ќе бидат репрезентативни претставници на работниците заедно со работодавачите ќе постигнат консензус, а ние тој консензус ќе го почитуваме“, кажа Мицкоски.
